اعمدة

العيكورة | ما بين عرمان والمخزنجي و(شوال الملح)

بقلم /صبري محمد علي (العيكورة)

خاص ب [الاونلاين] نقلت [الانتباهة اونلاين] تدوينة للسيد ياسر عرمان (يقول انه) رئيس الحركة الشعبية التيار الثوري … عبر صفحته (بالفيسبوك)
يبدئ فيها تخوفه على (الاطاري) من تغول (الفلول) فى اشارة منه للاسلاميين دون تسميتهم و اضاف ان التخريب يتمثل فى (إغراقه) بالاطراف المعادية للتحول المدني
(يعني عاوزنها عضلات)
و(شطح) فى الكلام مستنكرا الدعوة للانتخابات ومش عارف الحلم بعودة فردوس العرش المفقود للاسلاميين كما وصفه.

غايتو يا عرمان ….
والله حالكم بقى يحنن .. ياخ كدي اووول حاجة اعلن لنا عن عضوية حزبك الحركة الشعبية (قال) التيار الثوري خلاس صدقناك.
وبلاش هياكله بس ورينا عددكم كم؟
ماهو …
لازم نعرف نحن كمراقبين للساحة السياسية (اااي نعم) تابعنا حكاية الطلاق اللا رجعي بينكم وبين السيد عقار .
لكن انت الان معاك منو ؟ نايبك منو؟ هياكلك وينا؟ مقركم زاااتو وين ؟ عندكم فروع واللا الحكاية صفحات تواصل ساكت ؟ تمويلكم من وين؟
ورينا ياخ (إمكن) نقتنع و نتقدم بطلب عضوية بدل مااااا انت قاعد فى الشمس براك شايل ليك يافطة وكل فترة ناطي لينا بمفرداتك البايخة دى !

ياخي …
صدقناااك (تب) عندك حزب ورينا ليهو اين هو من هموم وقضايا الناس (وين) قوافلك الاغاثية مع الرجال؟ ورينا ندواتك السياسية مع الاحزاب؟ يعني اعمل اى حركة كده ؟

تعرف يا عرمان ….
وانا بقرأ تدوينتك بالامس الخميس عبر [الانتباهة اونلاين] ذكرتني قصة كنت شاهدا عليها اوائل الثمانينيات من القرن الماضي .
حدث ان …..
تصرف احد المخزنجية بمشروع قومي معروف على مخزون (ملح السماد) ثم احدث فتحة فى جدار المخزن وادعي انه قد سُرق . فجاءت مباحث ذلك المشروع وفى اثناء المعاينة الاولية اكتشف احد افراد المباحث ان الفتحة لا يمكن لها ان تسع لاخراج (شوال الملح) اصلا ! فهمتا علي؟

فقال لذلك المخزنجي وبكل ادب ياخى (نحن مصدقين) ان المخزن قد سرق . فتعال طلع لينا شوال من هذه الفتحة ! فبهت الذى سرق !

فنحن كذلك مصدقين ان لك حزب بس ياخ تعال كمان طلع لينا شوال الملح ده زى شوالات الاحزاب التانية المحترمة

اضغط هنا للإنضمام لمجموعة ( سوان لايف ) على الواتسب

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى